រាជធានីភ្នំពេញ៖ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ឯកឧត្តមឧបនាយករដ្ឋមន្ត្រី ប្រាក់ សុខុន នៅថ្ងៃទី២០មីនានេះ បានចុះហត្ថលេខា លើលិខិតប្ដូរសារ និងឯកសារពាក់ព័ន្ធមួយចំនួន ទទួលជំនួយឥតសំណងពីប្រទេសជប៉ុនប្រមាណ១០,៤លានដុល្លារអាម៉េរិក។ នេះបើតាមសេចក្តីប្រកាសព័ត៌មានរបស់ក្រសួងការបរទេស…។
ពិធីចុះហត្ថលេខាធ្វើឡើងនៅទីស្ដីការក្រសួងការបរទេស ដោយមានភាគីជប៉ុន លោក អ៊ូអ៊ីណូ អាត់ស៊ូ (UENO Astushi) ឯកអគ្គរដ្ឋទូតប្រចាំកម្ពុជា។ ឯកសារពាក់ព័ន្ធដែលបានចុះហត្ថលេខានៅថ្ងៃនេះ មានពីរសំខាន់ៗរួមាន៖ទី១.ហិរញ្ញប្បទានឥតសំណងរបស់រដ្ឋាភិបាលជប៉ុន សម្រាប់គម្រោងពង្រឹងសមត្ថភាពអង្គភាព CMAC លើកិច្ចសហប្រតិបត្តិការត្បូង-ត្បូងក្រោមគម្រោងកម្មវិធីអភិវឌ្ឍន៍សេដ្ឋកិច្ច និងសង្គម មានទឹកប្រាក់ចំនួន១៤៦៦លានយ៉េន ស្មើនឹងប្រមាណ៨,៣លានដុល្លារអាម៉េរិក។ កញ្ចប់ថវិកានេះ នឹងត្រូវប្រើប្រាស់ដើម្បីទិញសម្ភារបច្ចេកទេសរួមមាន៖ គ្រឿងចក្រកម្ទេចមីន ម៉ាស៊ីនរាវមីន និងរថយន្តជាដើម ដើម្បីលើកកម្ពស់សម្ភារបច្ចេកទេសនៃកិច្ចសហប្រតិបត្តិការផង និងសម្រាប់បម្រើកិច្ចការហ្វឹកហ្វឺនអ្នកជំនាញសកម្មភាពមីនទាំងក្នុងតំបន់និងអន្តរជាតិ។
រីឯទី២.ហិរញ្ញប្បទានឥតសំណងបន្ថែមរបស់រដ្ឋាភិបាលជប៉ុន មានទឹកប្រាក់ចំនួន៣០លានយ៉េន ស្មើនឹងប្រមាណ២,១លានដុល្លារអាម៉េរិក សម្រាប់គាំទ្រគម្រោងសាងសង់អាគារហ្វឹកហ្វឺន និងអាគារផ្សព្វផ្សាយអប់រំយល់ដឹងពីសង្គ្រាម (សារមន្ទីរតេជោសន្ដិភាព) នៃមជ្ឈមណ្ឌលសកម្មភាពកម្ចាត់មីនកម្ពុជា។ ហិរញ្ញប្បទានឥតសំណងក្នុងគម្រោងនេះ សរុបកើនដល់ចំនួន២៧៥១លានយ៉េន ប្រមាណជិត២០លានដុល្លារអាម៉េរិក។ នេះបើតាមការបញ្ជាក់បន្ថែមរបស់អគ្គនាយកស៊ីម៉ាក់។
ក្រសួងការបរទេសរំពឹងថា ហិរញ្ញប្បទានឥតសំណងសម្រាប់គម្រោងទាំងពីរខាងលើនឹងរួមចំណែកដល់យុទ្ធសាស្ត្រជាតិ សកម្មភាពបោសសម្អាតមីនរបស់កម្ពុជា ឆ្ពោះទៅសម្រេចបាននូវគោលដៅប្រទេសកម្ពុជាគ្មានមីននៅឆ្នាំ២០៣០ ព្រមទាំងបញ្ជាក់ជាថ្មីនូវការប្តេជ្ញាចិត្តយ៉ាងមុតមាំរបស់ជប៉ុន ក្នុងការបន្តគាំទ្រដល់ការអភិវឌ្ឍសេដ្ឋកិច្ច-សង្គមនៅកម្ពុជា។
ឯកឧត្តម ហេង រតនា អគ្គនាយកស៊ីម៉ាក់ បានសម្ដែងការគោរពអរគុណដ៏ជ្រាលជ្រៅបំផុតចំពោះ លោកឧបនាយករដ្ឋមន្ត្រី និងលោកឯកអគ្គរដ្ឋទូត ដែលផ្តល់ការគាំទ្រ និងចុះហត្ថលេខាលើគម្រោងដ៏មានសារប្រយោជន៍សម្រាប់បុព្វហេតុមនុស្សវិស័យមីនទាំង២នេះ៕
