រាជធានីភ្នំពេញ ៖ នារសៀលថ្ងៃទី១០ ខែឧសភា ឆ្នាំ២០២៥នេះ ជនសង្ស័យ ៣នាក់ ត្រូវបានកម្លាំងសមត្ថកិច្ចការិយាល័យនគរបាលព្រហ្មទណ្ឌកម្រិតស្រាល ចាប់ខ្លួនបញ្ជូនទៅសាលាដំបូងរាជធានីភ្នំពេញ ដោយជាប់ពាក់ព័ន្ធពីបទ.លួចមានស្ថានទម្ងន់ទោស ក្នុងនោះមានជនសង្ស័យ ២នាក់ ជាជនដៃដល់ ប្រើកាំបិតបុ័ងតោ កាប់ប្លន់ម៉ូតូជនរងគ្រោះ និងម្នាក់ជាប់ពាក់ព័ន្ធទទួលផលចោរកម្ម។ ប៉ុន្តែក្រោយពីបញ្ចប់បើកការស៊ើបសួរ តំណាងអយ្យការបានសម្រេចធ្វើការចោទប្រកាន់តែជនសង្ស័យ ២នាក់ទេ ម្នាក់ដោះលែងឲ្យទៅផ្ទះវិញ ។
បើតាមលោក ឆាយ ហុង ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ នារសៀលថ្ងៃទី១០ ខែឧសភា ឆ្នាំ២០២៥នេះ បានឲ្យដឹងថា “ករណីខាងលើ ត្រូវបានតំណាងអយ្យការបើកការស៊ើបសួរលើជនសង្ស័យឈ្មោះ វ៉ាន់ ផានិត និងឈ្មោះ សឿន អាណាន់ ព្រមទាំងបក្ខពួក ពីបទ.លួចមានស្ថានទម្ងន់ទោស តាមមាត្រា ៣៥៣ និងមាត្រា ៣៥៧ នៃក្រមព្រហ្មទណ្ឌ ។ ដោយឡែក ឈ្មោះ លឹម ធារិទ្ធ ដែលពុំជាប់ពាក់ព័ន្ធនឹងសកម្មភាពលួចមានស្ថានទម្ងន់ទោស ហើយទទួលបញ្ចាំដោយពុំដឹងថា ជាទ្រព្យបានពីបទឧក្រិដ្ឋ ឬមជ្ឈឹម ត្រូវបានតំណាងអយ្យការ ដោះលែងឲ្យមានសេរីភាពវិញ ។
សូមជម្រាបថា កាលពីថ្ងៃទី០៤ ដល់ថ្ងៃទី០៦ ខែឧសភា ឆ្នាំ២០២៥ កម្លាំងសមត្តកិច្ចការិយាល័យនគរបាលព្រហ្មទណ្ឌ សហការជាមួយអធិការដ្ឋាននគរបាលខណ្ឌកំបូល និងខណ្ឌពោធិសែនជ័យ បានធ្វើការស្រាវជ្រាវ និងឃាត់ខ្លួនជនសង្ស័យជាបន្តបន្ទាប់ ចំនួន០៣នាក់ ចាប់យករថយន្ត ជាមធ្យោបាយជិះធ្វើសកម្មភាព និងម៉ូតូរបស់ខ្លួនរងគ្រោះ ពាក់ព័ន្ធអំពើលួចមានស្ថានទម្ងន់ទោស ដោយសារការប្រព្រឹត្តអំពើហិ.ង្សា (ប្រើអាវុធខ្លីជ័រ.ក្លែងក្លាយ) ភ្ជង់គំរាម និងកាំបិតប៉័ងតោ ចំនួន០២ដើម កាប់លើជនរងគ្រោះ តែមិនត្រូវ ដោយប្លន់យកម៉ូតូ ចំនួន០២គ្រឿង ៖ មួយគ្រឿង ម៉ាកហុងដាប៊ីត ពណ៌ខៀវ សេរីឆ្នាំ២០២៤ ពាក់ផ្លាកលេខ កណ្តាល 1AS-8756 និងមួយគ្រឿងទៀត ម៉ាកស៊ុយហ្ស៊ុយគីនិច ពណ៌លឿង សេរីឆ្នាំ២០២០ ពាក់ផ្លាកលេខភ្នំពេញ 1IA-2135 , ខ្សែកផ្លាកទីនចំនួន០២ ខ្សែ , ទូរសព្ទដៃម៉ាកអាយហ្វូនអ៊ិច ចំនួន ០១ គ្រឿង និងទូរសព្ទដៃម៉ាកអាយហ្វូន១២ ចំនួន០១ គ្រឿង ដែលបានប្រព្រឹត្តនៅចំណុចវាលស្រែ ផ្លូវលំ ភូមិត្រពាំងអារ័ក្ស សង្កាត់ឪឡោក ខណ្ឌកំបូល រាជធានីភ្នំពេញ នៅវេលាម៉ោង១៤ និង៤០ នាទីថ្ងៃទី០២ ខែឧសភា ឆ្នាំ២០២៥ ។
ករណីខាងលើនេះ សមត្ថកិច្ចបានចាប់ខ្លួនជនសង្ស័យចំនួន០៣នាក់ ៖
១. ឈ្មោះ សឿន អាណន់ ហៅ នន់ ភេទប្រុស អាយុ២១ឆ្នាំ មុខរបរ ជាងជួសជុលរថយន្ត មានទីលំនៅ ផ្លូវបេតុង ភូមិខ១ សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ ។
២. ឈ្មោះ វ៉ាន់ ផានិត ហៅ នីត ភេទប្រុស អាយុ២១ឆ្នាំ មុខរបរ កម្មករសំណង់ មានទីលំនៅ ផ្លូវបេតុង ភូមិសាមគ្គី៥ សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ ។
៣. ឈ្មោះ លឹម ធារិទ្ធ ភេទប្រុស អាយុ៣១ ឆ្នាំមុខរបរ លក់ដូរ ទីលំនៅផ្ទះលេខ៨៤ ផ្លូវបេតុង ភូមិអូរដឹម សង្កាត់ចោមចៅ៣ ខណ្ឌពោធិសែនជ័យ រាជធានីភ្នំពេញ (ត្រូវបានដោះលែង) ។
ដកហូតវត្ថុតាងជាមធ្យោបាយជិះធ្វើសកម្មភាព ៖
-ម៉ូតូម៉ាកហុងដាសេ១២៥ ពណ៌ខ្មៅ សេរីឆ្នាំ២០១៧ មួយគ្រឿងពាក់ផ្លាកលេខ កំពង់ចាម 1U-5680 ។
-រថយន្តម៉ាក LEXUS CT200H ពណ៌ សូកូឡា សេរីឆ្នាំ២០១១ ពាក់ផ្លាកលេខភ្នំពេញ 2BZ-6071 មួយគ្រឿង ។
-ទូរសព្ទដៃម៉ាកអាយហ្វូន ១១ ប្រូម៉េក ពណ៌ ខ្មៅ ០១ គ្រឿង ។
និងចាប់យកភស្តុតាងម៉ូតូជនរងគ្រោះចំនួន០២ គ្រឿង ។
ជនរងគ្រោះក្នុងអំពើប្លន់នោះមាន ២នាក់ ម្នាក់ឈ្មោះ ស.រ.ត.ន ភេទប្រុស អាយុ១៩ឆ្នាំ មុខរបរនិស្សិត មានទីលំនៅ ផ្លូវលំ ភូមិត្រពាំងក្រសាំង ឃុំម្កាក់ ស្រុកអង្គស្នួល ខេត្តកណ្តាល ។ និងម្នាក់ឈ្មោះ ត.ប.ផ ភេទស្រី អាយុ១៦ ឆ្នាំ មុខរបរសិស្ស មានទីលំ នៅផ្ទះផ្លូវលំ ភូមិទន្លាប់ ឃុំទួលព្រិច ស្រុកអង្គស្នួល ខេត្តកណ្តាល ។ ក្រោយឃាត់ខ្លួនជនសង្ស័យ និងវត្ថុតាង ត្រូវបានកសាងសំណុំ រឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនិតិវិធី ៕
