អ្នកវិនិយោគចិន បង្ហាញ់ចំណាប់អារម្មណ៍លើការវិនិយោគស្វាយចន្ទីនាំចេញទៅទីផ្សារប្រទេសចិន

រាជធានីភ្នំពេញ៖ នាជំនួបពិភាក្សាការងារជាមួយលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា កាលពីថ្ងៃទី១១ ខែមីនា ឆ្នាំ២០២៥ កន្លងទៅនេះលោក លាវ យ៉ុង ប្រធានសមាគមអ្នកវិនិយោគវ័យក្មេងនៅសាធារណរដ្ឋប្រជាមានិតចិន បានបង្ហាញចំណាប់អារម្មណ៍ក្នុងការសិក្សា និងស្វែងរកអ្នកផ្គត់ផ្គង់ស្វាយចន្ទីដែលមានស្រាប់សម្រាប់បម្រើឱ្យការនាំចេញទៅទីផ្សារប្រទេសចិន…។

ក្នុងឱកាសនោះ លោកប្រធានសមាគមវិនិយោគិនវ័យក្មេងចិន បានគូសបញ្ជាក់ថា កន្លងមកលោកបានស្វែងរកអ្នកផ្គត់ផ្គង់ស្វាយចន្ទី ប៉ុន្តែមិនស្គាល់ពីប្រភព និងបណ្តាញច្បាស់លាស់ ហើយឆ្លៀតក្នុងពេលនេះ និងតាមរយៈជំនួបលើកនេះដែរ លោកសង្ឃឹមថាលោកអគ្គលេខាធិការ នឹងចង្អុលបង្ហាញពីប្រភពច្បាស់លាស់ ដើម្បីបង្កើននូវទំនុកចិត្តរបស់លោកបន្ថែមទៀត។ ជាមួយគ្នា លោកអគ្គលេខាធិការ បានជម្រាបជូនអំពីការគាំទ្រ និងការលើកទឹកចិត្តនានារបស់រាជរដ្ឋាភិបាល លើគម្រោងវិនិយោគក្នុងវិស័យស្វាយចន្ទីនៅកម្ពុជា ជាពិសេសគំនិតផ្ដួចផ្ដើមដ៏ខ្ពង់ខ្ពស់របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងការបង្កើតសួនឧស្សាហកម្មស្វាយចន្ទី ដែលនឹងជួយបង្កើនភាពអំណោយផលនៃបរិយាកាសធុរកិច្ចក្នុងវិស័យអាទិភាពនេះ។ 

ទន្ទឹមនឹងនេះ លោកអគ្គលេខាធិការ ក៏បានបង្ហាញជូនពីខ្សែច្រវាក់តម្លៃនៃឧស្សាហកម្មស្វាយចន្ទី រាប់ចាប់តាំងពីផ្នែកខាងលើ (upstream) ជាពិសេសពាក់ព័ន្ធនឹងការប្រមូលទិញ ទីលានសម្ងួត និងឃ្លាំងស្តុកទុកគ្រាប់ស្វាយចន្ទី។ លោកអគ្គលេខាធិការ បន្តថា ស្ថានភាពវិនិយោគនៅកម្ពុជាមានកំណើនពីមួយឆ្នាំទៅមួយឆ្នាំ ជាពិសេសប្រភពទុនវិនិយោគមកពីប្រទេសចិន បានឈរនៅលំដាប់កំពូលជាបន្តបន្ទាប់ក្នុងរយៈពេលជាង១ទសវត្សរ៍ចុងក្រោយនេះ។ ជាក់ស្តែង នៅក្នុងឆ្នាំ២០២៤ ការវិនិយោគមកពីប្រទេសចិន មានដល់ទៅប្រមាណ៥០ភាគរយនៃទុនវិនិយោគសរុប។ តាមការកត់សម្គាល់ ឃើញថា មានក្រុមហ៊ុនចិនធំៗជាច្រើនបានមកបណ្តាក់ទុនវិនិយោគនៅកម្ពុជា នៅក្នុងការអភិវឌ្ឍតំបន់សេដ្ឋកិច្ចពិសេស និងការវិនិយោគក្នុងកន្សោមឧស្សាហកម្មថ្មីៗ ដូចជាការផលិតសំបកកង់រថយន្ត ការផ្គុំដំទ្បើងបរិក្ខារអេទ្បិចត្រូនិក ការកែច្នៃជ័រកៅស៊ូជាដើម។ល៕