រាជធានីភ្នំពេញ៖ តាមរយៈការដាក់ឱ្យដំណើរការគំនិតផ្តួចផ្តើមថ្មីមួយរបស់សហភាពអឺរ៉ុប គឺកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) លោកស្រី នីកូឡា បៀរ៍ អះអាងថា ជំនួយនឹងអាចជួយឱ្យកសិករកម្ពុជាងាយស្រួលស្វែងរកទីផ្សារ។
លោកស្រី នីកូឡា បៀរ៍ អនុប្រធានធនាគារវិនិយោគអឺរ៉ុបសកល (EIB Global) ថ្លែងដូច្នេះក្នុងសន្និសីទសារព័ត៌មាន ស្តីពីការដាក់អនុវត្តកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) កាលពីរសៀលថ្ងៃទី១៤ ខែមីនា ឆ្នាំ២០២៥។ តាមរយៈកម្មវិធីនេះ ធនាគារវិនិយោគអឺរ៉ុបសកល (EIB Global) បានផ្តល់ជំនួយឥតសំណង់ចំនួន៨០លានអឺរ៉ូ ឬស្មើនឹងប្រមាណ៨៧លានដុល្លារអាម៉េរិក ឱ្យរាជរដ្ឋាភិបាលកម្ពុជា បង្កើនសមត្ថភាពដំណាំដើម្បីនាំចេញ។ ក្នុងនោះ លោកស្រី មានប្រសាសន៍ថា ជំនួយដែលបានផ្តល់ឱ្យនឹងផ្តោតសំខាន់ទៅលើកសិករខ្នាតតូច ឬគ្រួសារដែលមានដីធ្លីខ្នាតតូច តាមរយៈការធ្វើទំនើបកម្មកសិកម្ម, ការបង្កើនសន្តិសុខស្បៀងអាហារ, លើកកម្ពស់សុវត្ថិភាពចំណីអាហារ, និងពង្រឹងសក្តានុពលភាពនៃការនាំចេញផលិតផលកសិកម្មជាដើម។
លោកស្រីពន្យល់ថា៖«ទំនើបកម្មកសិកម្មនឹងធ្វើឡើងតាមរយៈការបង្កើនការត្រួតពិនិត្យស្បៀងអាហាររបស់ប្រជាកសិករ ព្រោះអាហារដែលមានគុណភាពស្ដង់ដារ នឹងមានលទ្ធភាពខ្ពស់ក្នុងការស្វែងរកទីផ្សារដើម្បីនាំចេញ»។ ក្រៅពីការធ្វើទំនើបកម្មកសិកម្ម ជំនួយក៏នឹងជួយទៅដល់ការបង្កើនសមត្ថភាពរបស់មន្ទីរពិសោធន៍កសិកម្មជាតិ ក្នុងការត្រួតពិនិត្យផលិតផលកសិកម្ម បូករួមទាំងការកសាងស្ពានមួយខ្សែជូនប្រជាកសិករនៅក្នុងភូមិសាស្ត្រខ្សាច់ទន្លេផងដែរ។ លោកស្រីអះអាង៖«ប្រសិនបើកសិករមានផលិតផលមានគុណភាពខ្ពស់ហើយ គឺទាមទារត្រូវតែមានមធ្យោបាយដឹកជញ្ជូនទៅកាន់ទីផ្សារ ដូច្នេះ ស្ពានគឺពិតជាមានសារសំខាន់ណាស់»។ តាមរយៈការកិច្ចការខាងលើ ដូចជាការធ្វើការធ្វើទំនើបកម្មកសិកម្ម ការបង្កើនគុណភាពផលិតផល រួមទាំងការសាងសង់ស្ពាន លោកស្រីសង្ឃឹមថា នឹងអាចធ្វើឱ្យកសិករកម្ពុជាងាយស្រួលក្នុងការស្វែងរកទីផ្សារ ទោះបីលោកស្រីមិនបានទៅរកទីផ្សារឱ្យផ្ទាល់ក៏ដោយ។
លោកស្រីបញ្ជាក់ថា នឹងធ្វើការជាមួយរាជរដ្ឋាភិបាលកម្ពុជា ជាក់ស្តែងដូចជាក្រសួងកសិកម្ម រុក្ខាប្រមាញ់ និងនេសាទ ក្រសួងសេដ្ឋកិច្ច និងហិរញ្ញវត្ថុ ដើម្បីផ្តល់កម្ចីឱ្យប្រជាកសិករ ក៏ដូចជាធ្វើឱ្យកសិករងាយស្រួលក្នុងការស្វែងរកទីផ្សារដើម្បីនាំចេញ។ គួរបញ្ជាក់ថា កិច្ចព្រមព្រៀងផ្តល់ជំនួយត្រូវបានធ្វើឡើងកាលពីព្រឹកថ្ងៃទី១៤ ខែមីនា ឆ្នាំ២០២៥ រវាងលោកស្រី នីកូឡា បៀរ៍ អនុប្រធានធនាគារវិនិយោគអឺរ៉ុបសកល (EIB Global) និងលោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ ជំនួយដែលបានផ្តល់មានចំនួន៨០លានអឺរ៉ូ ឬស្នើនឹងប្រមាណ៨៧លានដុល្លារអាម៉េរិក នឹងផ្តល់អត្ថប្រយោជន៍ដោយផ្ទាល់ដល់កសិករខ្នាតតូចចំនួន១០ម៉ឺននាក់, គ្រួសារមានដីធ្លីខ្នាតតូចចំនួន២ម៉ឺន៥ពាន់គ្រួសារ និងសហគ្រាសកសិកម្មចំនួន៥០០ទីតាំង៕
