ខេត្តស្វាយរៀង៖ សង្ស័យផ្ទុះគ្រាប់មីនតោន ចំកណ្តាលផ្ទះវីឡាតឿមួយខ្នងនៅក្រុងបាវិត ដែលបណ្តាលឲ្យបាក់បែកខូចខាតផ្ទះទាំងស្រុង ប៉ុន្តែសំណាងល្អ ស្ត្រីម្ចាស់ផ្ទះ ចេញមកលក់ដូរនៅតូបខាងមុខផ្ទះ គេចផុតពីផ្ទុះ កុំអីមិនដឹងទៅជាយ៉ាងណានោះទេ ចំណែកប្តី និងកូនៗ ក៏ចេញទៅធ្វើការក្រៅផ្ទះអស់ផងដែរ។
ករណីផ្ទុះគ្រាប់លាន់ដូចរន្ទះបាញ់នេះ បានកើតឡើងនៅវេលាម៉ោង០២ និង៥នាទី នៅរសៀលថ្ងៃទី២១ មីនា ២០២៥ នៅចំណុចផ្ទះជាងបុកអណ្តូង ដែលមានយីហោ «សីពៅ» ស្ថិតនៅភូមិ កណ្តាល សង្កាត់ប្រាសាទ ក្រុងបាវិត ខេត្តស្វាយរៀង។បើតាមស្ត្រីម្ចាស់ផ្ទះរងគ្រោះ បានឲ្យដឹងថា នេះសំណាងល្អខ្លាំងណាស់ មុនពេលកើតហេតុ រូបគាត់បានដើរចេញមកតូបលក់ដូរខាងមុខផ្ទះ ស្រាប់តែឮសំឡេងផ្ទុះគ្រាំងកក្រើកដី ឃើញផ្ទះរបស់គាត់ប៉ើងដុំថ្ម និងដំបូលផ្ទះខ្ទាតឡើងលើ ផ្សែងហុយខ្មួលខ្មាញ់ឡើងលើ គាត់ភ័យតក់ស្លុតយ៉ាងខ្លាំង និងបង្កឲ្យមានការភ្ញាក់ផ្អើលដល់អ្នកភូមិ និងអ្នកធ្វើដំណើរតាមដងផ្លូវ មកចោមរោមមើលពីចម្ងាយដោយមិនហ៊ានចូលជិត។
ស្ត្រីម្ចាស់ផ្ទះរងគ្រោះ បានឲ្យដឹងបន្តថា ចំណែកប្តីរបស់គាត់ និងកូនៗ ក៏បានចេញទៅធ្វើការខាងក្រៅអស់ ទើបគ្មានប៉ះពាល់ដល់អាយុជីវិត។
បើតាមអ្នកឃើញហេតុការណ៍ បានប្រាប់ថា មុនដំបូងនឹកស្មានថា ជាករណីផ្ទុះធុងហ្គាស់ ក៏ប៉ុន្តែបើតាមការសន្និដ្ឋានបឋមរបស់សមត្ថកិច្ចសង្ស័យជាករណីផ្ទុះមីនតោន ចំកណ្តាលផ្ទះ ទើបកម្លាំងផ្ទុះខ្លាំងបណ្តាលឲ្យបាក់បែកបន្ទប់ជញ្ជាំងថ្ម ដំបូលផ្ទះវីឡាតឿ ១ខ្នង ប៉ើងខ្ទេចខ្ទី រាបដល់ដី បែបនេះ (សល់តែជញ្ជាំងខាងមុខប៉ុណ្ណោះ)។
ប្រភពសមត្ថកិច្ចប្រាប់បន្តថា តាមការពិនិត្យមើលកន្លែងកើតហេតុ គឺឃើញមានរណ្តៅមួយចំកណ្តាលផ្ទះ ស្នាមគ្រាប់ផ្ទុះចេញពីក្នុងដី ដោយផ្ទះនេះ ទើបតែសាងសង់រួចថ្មីៗ ដោយលើកដីដាក់ជាភូមិថ្មី សង្ស័យពេលជីករណ្តៅដី យកអាចម៌ដីមកចាក់លើកភូមិ ដើម្បីសង់ផ្ទះនោះ ជីកដោយគ្រាប់មីនតោន មកជាមួយ ដែលវាកប់ក្នុងដីកណ្តាលផ្ទះ ហើយមិនដឹងថា មានមូលហេតុអ្វី ស្រាប់តែផ្ទុះបែបនេះតែម្តង។
សំណាងល្អដែលករណីផ្ទុះនេះ បើផ្ទុះចំពេលក្រុមគ្រួសារកំពុងស្នាក់នៅក្នុងផ្ទះ ពេលដេក ឬសម្រាកនៅពេលយប់ ឬពេលបាយជុំគ្នាវិញ មិនដឹងថា វាសនាទៅជាយ៉ាងណាទេ បើផ្ទះ ១ខ្នង បាក់បែកខ្ទេចខ្ទី រាបដល់ដីបែបនេះ សូម្បីទ្រព្យសម្បត្តិ គ្រឿងសម្ភារៈ តុទូ គ្រែ កន្ទេលពូកខ្នើយ ខូចគ្មានសល់ក្នុងផ្ទះបាក់បែកខ្ទេចខ្ទីទាំងស្រុងបែបនេះ។
សូមបញ្ជាក់ថា ភូមិកណ្តាល សង្កាត់ប្រាសាទនេះ គឺនៅជិតព្រំដែន ក្នុងសម័យសង្គ្រាម គឺជាទីតាំងសមរភូមិផងដែរ ទើបមានគ្រាប់មីនកប់ក្នុងដីដូច្នេះ ដែលសង្ស័យសល់ពីជំនាន់សង្គ្រាមក៏មិនដឹង៕
