រាជធានីភ្នំពេញ៖ លោកស្រី ផែថងថាន ស៊ីណាវ៉ាត្រ ក្នុងដំណើរទស្សនកិច្ចផ្លូវការរបស់នាយករដ្ឋមន្រ្តីថៃ មកកាន់កម្ពុជា ថ្នាក់ដឹកនាំនៃប្រទេសកម្ពុជា-ថៃ បានឯកភាពគ្នានៅក្នុងការផ្ដល់កិច្ចសហការបន្ថែមដែលមានស្រាប់រួមមាន ការចែករំលែកព័ត៌មាន ដើម្បីប្រយុទ្ធប្រឆាំងឧក្រិដ្ឋកម្មឆ្លងដែន ក៏ដូចជាការឆបោកតាមបច្ចេកវិទ្យា ការផ្សព្វផ្សាយព័ត៌មានក្លែងក្លាយ ការជួញដូរមនុស្ស និងការរត់ពន្ធទំនិញខុសច្បាប់។
សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់អំពីសារៈសំខាន់ នៃការកសាងព្រំដែនមួយប្រកបដោយសន្ដិភាព ស្ថិរភាព ដោយភាគីទាំងពីរ បានឯកភាពគ្នាពង្រឹងកិច្ចសហប្រតិបត្តិការកងទ័ពពិសេសនៅតាមព្រំដែន។ កម្ពុជាក៏បានថ្លែងអំណរគុណនូវគោលនយោបាយរបស់ថៃ ដោយមិនអនុញ្ញាតឱ្យជនណាម្នាក់ប្រើប្រាស់ទឹកដីថៃ ដើម្បីជ្រៀតជ្រែកកិច្ចការផ្ទៃក្នុង ឬធ្វើសកម្មភាពបង្កគ្រោះថ្នាក់ដល់កម្ពុជា ហើយកម្ពុជាក៏អនុវត្តគោលការណ៍នេះដូចគ្នា។
ចំណែកនាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ បានបញ្ជាក់ថា ភាគីទាំងពីរបានឯកភាពពង្រឹងភាពជាដៃគូរផ្នែកសន្តិសុខ ដោយជំរុញកិច្ចសហប្រតិបត្តិការវិស័យយោធានៅគ្រប់កម្រិតដើម្បីរក្សាសន្តិភាពនៅតាមព្រំដែនរួម។ ក្នុងន័យនេះលោកស្រី បានអរគុណរដ្ឋាភិបាលកម្ពុជាដែលបានផ្ដល់កិច្ចសហការល្អក្នុងសកម្មភាពប្រយុទ្ធប្រឆាំងនឹងបទល្មើសឆបោកតាមប្រព័ន្ធបច្ចេកវិទ្យា និងបានអះអាងពីការបន្តសហការគ្នាដើម្បីលុបបំបាត់បណ្ដាញឧក្រិដ្ឋកម្មនេះឱ្យអស់ពីតំបន់ព្រំដែនកម្ពុជា-ថៃផងដែរ។
ពាក់ព័ន្ធការអភិវឌ្ឍតាមព្រំដែន ភាគីទាំងពីរនឹងពន្លឿនការដោះមីននៅតាមព្រំដែន និងជំរុញកិច្ចសហប្រតិបត្តិការរវាងតំបន់សេដ្ឋកិច្ចពិសេសតាមព្រំដែន ដោយនឹងបញ្ចប់ឱ្យបានលឿននូវកិច្ចព្រមព្រៀងដឹកជញ្ជូនទ្វេរភាគីដើម្បីអនុញ្ញាតឱ្យយានយន្តឯកជនរបស់ពលរដ្ឋនៃប្រទេសទាំងពីរឆ្លងព្រំដែន។ នាយករដ្ឋមន្ត្រីថៃលោកស្រី ផែថងថាន រំពឹងថា ពាណិជ្ជកម្មទ្វេរភាគីនៃប្រទេសទាំងពីរនឹងកើនឡើងពី១០ប៊ីលានដុល្លាអាមេរិកដល់១៥ប៊ីលានដុល្លាអាមេរិកនៅឆ្នាំ២០២៧។
គួរឱ្យដឹងថា ដំណើរទស្សនកិច្ចផ្លូវការរបស់នាយករដ្ឋមន្រ្តីថៃលោកស្រីផែថងថាន ស៊ីណាវ៉ាត្រ ធ្វើឡើងរយៈពេល២ថ្ងៃ ចាប់ពីថ្ងៃទី២៣-២៤ ខែមេសា ឆ្នាំ២០២៥ ចំពេលប្រទេសទាំងពីរកំពុងប្រារព្ធខួបលើកទី៧៥នៃទំនាក់ទំនងការទូត។ ថ្ងៃដំបូងនៃដំណើរទស្សនកិច្ច កម្ពុជាបានចុះហត្ថលេខាលើកិច្ចព្រមព្រៀង និងអនុស្សរៈយោគយល់គ្នាចំនួន៧ជាមួយថៃ។ ១ក្នុងចំណោមកិច្ចព្រមព្រៀងនិងអនុស្សរៈយោគយល់គ្នាទាំង៧ នាយករដ្ឋមន្ត្រីថៃបានលើកឡើងពីការបំពុលបរិយាកាសឆ្លងដែន និងពង្រឹងកិច្ចសហការប្រឆាំងនឹងការបំពុលPM2.5តាមរយៈការផ្លាស់ប្តូរព័ត៌មាននិងការកសាងសមត្ថភាព៕
