រដ្ឋធានីវ៉ាស៊ីនតោន៖ ប្រធានាធិបតីអាម៉េរិក ដូណាល់ ត្រាំ កាលពីថ្ងៃពុធទី២៦មីនា បានដាក់ពន្ធ២៥ភាគរយលើការនាំចូលរថយន្ត និងរថយន្តដឹកទំនិញធុនស្រាល ដែលនឹងចាប់ផ្តើមនៅសប្តាហ៍ក្រោយ ខណៈការប្រកាសក្តែងៗរបស់បុរសឥន្រ្ទីចំពុះដែករូបនេះ ប្រៀបបានទៅនឹងការផ្លុំរងើកភ្លើងសង្រ្គាមពាណិជ្ជកម្មពិភពលោកឱ្យឆាបឆេះកាន់តែខ្លាំងឡើង…។
ត្រាំ អះអាងនៅក្នុងព្រឹត្តិការណ៍មួយក្នុងការិយាល័យប្រធានាធិបតីថា៖«អ្វីដែលយើងនឹងធ្វើនោះ គឺដាក់ពន្ធ២៥ភាគរយសម្រាប់រថយន្តទាំងអស់ ដែលមិនត្រូវបានផលិតនៅក្នុងសហរដ្ឋអាម៉េរិក»។ ជាមួយគ្នា ប្រធានកម្មករផលិតរថយន្តអាម៉េរិក(UAW) លោក ស៊ន ហ្វេន (Shawn Fain) អះអាងបន្ថែមថា៖«ពន្ធទាំងនេះ គឺជាជំហានដ៏សំខាន់មួយក្នុងទិសដៅដ៏ត្រឹមត្រូវសម្រាប់កម្មករផលិតរថយន្ត និងសហគមន៍អាវពណ៌ខៀវនៅទូទាំងប្រទេស[..]»។ តាមពិតទៅ លោកប្រធានាធិបតី ត្រាំ មើលឃើញថា ពន្ធ គឺជាឧបករណ៍ដើម្បីបង្កើនប្រាក់ចំណូលសម្រាប់ទូទាត់ការកាត់បន្ថយពន្ធ និងដើម្បីស្តារឡើងវិញនូវមូលដ្ឋានឧស្សាហកម្មរបស់សហរដ្ឋអាម៉េរិក ដែលបានដាំក្បាលចុះជាយូរមកហើយ។ ទន្ទឹមនឹងនេះ ការប្រមូលពន្ធលើរថយន្តនឹងចាប់ផ្តើមនៅថ្ងៃទី៣ ខែមេសា ពោលគឺមួយថ្ងៃបន្ទាប់ពីលោក ត្រាំ គ្រោងនឹងប្រកាសពន្ធទ្វេភាគី លើប្រទេសទាំងហ្លាយណា ដែលមានឱនភាពពាណិជ្ជកម្មជាមួយអាម៉េរិក។
ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន បានរិះគន់ចំណាត់ការនេះថា៖«អាក្រក់ពេកហើយសម្រាប់អាជីវកម្ម! កាន់តែធ្ងន់ធ្ងរហើយសម្រាប់អ្នកប្រើប្រាស់»។ ទន្ទឹមនេះ នាយករដ្ឋមន្រ្តីកាណាដា លោក ម៉ាក ខានី (Mark Carney) ចាត់ទុកចំណាត់ការរបស់ ត្រាំ ថា ជាការវាយប្រហារដោយផ្ទាល់លើកម្មករកាណាដា។ ជាមួយគ្នា លោក ខានី ក៏បានប្រាប់អ្នកយកព័ត៌មាននៅរដ្ឋធានីអូតាវ៉ាថា៖«យើងនឹងការពារកម្មកររបស់យើង យើងនឹងការពារក្រុមហ៊ុនរបស់យើង យើងនឹងការពារប្រទេសរបស់យើង ហើយយើងនឹងការពារជាមួយគ្នា»។
សេដ្ឋវិទូអាម៉េរិក លោក ប្រេដ សិតស៊ឺ អះអាងថា រថយន្តចំនួន៤លានគ្រឿងមកពីប្រទេសកាណាដា និងម៉ិកស៊ិក ឥឡូវនេះប្រឈមនឹងពន្ធ២៥ភាគរយ ឬច្រើនជាងនេះ ដែលទំនងជានឹងជំរុញឱ្យតម្លៃរថយន្តកើនឡើង និងធ្វើឱ្យការលក់រថយន្តរបស់សហរដ្ឋអាម៉េរិកធ្លាក់ចុះមួយរយៈ។ លោកបន្ថែមថា ពន្ធគយ គឺជាការរំលោភយ៉ាងច្បាស់នៃកិច្ចព្រមព្រៀងអាម៉េរិក-ម៉ិកស៊ិក-កាណាដា (USMCA)។ សូមរំឭកថា សហរដ្ឋអាម៉េរិកបាននាំចូលផលិតផលរថយន្តមានតម្លៃ៤៧៤ពាន់លានដុល្លារក្នុងឆ្នាំ២០២៤ រួមទាំងរថយន្តដឹកអ្នកដំណើរមានតម្លៃ២២០ពាន់លានដុល្លារ។ គួរបញ្ជាក់ថា ម៉ិកស៊ិក ជប៉ុន កូរ៉េខាងត្បូង កាណាដា និងអាល្លឺម៉ង់ គឺជាសម្ព័ន្ធមិត្តជិតស្និទ្ធរបស់សហរដ្ឋអាម៉េរិក និងជាអ្នកផ្គត់ផ្គង់រថយន្តចូលទីផ្សារអាម៉េរិកដ៏ធំបំផុត៕
